يا زمهريرْ | هزار طباخ

يا زمهريرْ
من يوم ضيّعني الدفا
ضاع الحلمْ
أخدوا الفَلَكْ
ع نْجوم أبعد م السما
شدّوا منِ جْناحو
وْرسَمْ
صورة مَلَكْ
ساحات عندي م الفرحْ
هربت لعندو
تلتجي
تنده
ولا تحيي الصممْ

يا زمهريرْ
نحنا زمن
ضيّع بإيدوا رسمة المفتاحْ
عَ بْوابنا
حيطان عِالية مسوّرة ْ
برّاتها
صوت الضحك
سوّاحْ
جوّاتها
أرواح تبكي مْكسّرةْ
عم تسمع ِهْبوب الشتي
جاية بكانون العتيقْ
وْمافي بإيدا م الدفا
إلا ّبقايا شال م الصوت الغريقْ .. !!

يا زمهريرْ
وشّي بإيدك
صار مربوطْ
خيطو بشوق الموت عم ينسج كفنْ
طلّعْ بوشّي
مَ انْمحى .. ؟!!
هيّو انْمحى
مبسوط
هيئتكْ مبسوط ْ
يا زمهريرْ
إيدكْ عَ إيدوا للزمنْ
حطّوا لوجّي بالكفنْ
وارْتاحْ